ആലക്കോട്‌: കന്നുപൂട്ടും ഞാറ്റുപാട്ടും കൊയ്‌ത്തുപാട്ടും ഇന്നു കേട്ടുകേള്‍വി മാത്രമായി. മണ്‍മറഞ്ഞുകൊണ്ടിരിക്കുന്ന നെല്‍കൃഷിയുടെ ദൃശ്യാവിഷ്‌കരണം ആലക്കോട്‌ ഇന്‍ഫന്റ്‌ ജീസസ്‌ എല്‍ പി സ്‌കൂളില്‍ അരങ്ങേറി. പതിനഞ്ച്‌ കുട്ടികള്‍ ചേര്‍ന്ന്‌ ഒരുക്കിയ ഈ കലാവിരുന്ന്‌ നാടകം, കലപ്പ, ഞവരി, വിതക്കൊട്ട എന്നിവയെല്ലാം ഉപയോഗിച്ചുള്ളതായിരുന്നു എന്നത്‌ പ്രത്യേക ശ്രദ്ധയാകര്‍ഷിച്ചു. കാളയ്‌ക്ക്‌ പകരം നുകം തോളിലേന്തി കലപ്പ വലിച്ചതും വിതക്കൊട്ട തോളിലേന്തി വിത്തു വിതച്ചതും അരിവാള്‍ കൊണ്ട്‌ നെല്‍കതിര്‍ കൊയ്യുന്നതുമെല്ലാം കുട്ടികള്‍ക്ക്‌ ഹരം പകര്‍ന്നു.
അന്യം നിന്നുകൊണ്ടിരിക്കുന്ന നെല്‍കൃഷിക്ക്‌ പുതുജീവനേകാന്‍ യുവതലമുറയെ പ്രാപ്‌തരാക്കുകയെന്ന ലക്ഷ്യം മുന്‍ നിര്‍ത്തി ഈ സ്‌കൂളിലെ അധ്യാപകനായ ലംബൈ മാത്യു രചനയും സംവിധാനവും നടത്തി അണിയിച്ചൊരുക്കിയ സംഗീതശില്‍പമാണ്‌ റോഡ്‌ ഷോയായി കുട്ടികള്‍ അവതരിപ്പിച്ചത്‌. സ്‌കൂള്‍ ഹെഡ്‌മിസ്‌ട്രസ്‌ സെലിഗ്രിന്‍ ജോസഫ്‌ ഷോ ഉദ്‌ഘാടനം ചെയ്‌തു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ