അല്‍ഫോന്‍സാമ്മയുടെ തിരുനാള്‍ ജൂലൈ 19 ന്‌ ആരംഭിക്കും
ഭരണങ്ങാനം വിശുദ്ധ അല്‍ഫോന്‍സാ തീര്‍ത്ഥാടനകേന്ദ്രത്തില്‍
അല്‍ഫോന്‍സാമ്മയുടെ തിരുനാള്‍ ജൂലൈ 19 ന്‌ ആരംഭിക്കും. തിരുനാളിനോടനുബന്ധിച്ച്‌ പാല
രൂപതയിലെ മാതൃജ്യോതി, ഫ്രാന്‍സിസ്‌കന്‍ മൂന്നാം സഭ, ചെറുപുഷ്‌പമിഷന്‍ ലീഗ്‌ എന്നീ
സംഘടനകള്‍ തീര്‍ത്ഥാടനങ്ങള്‍ നടത്തി. 19 ന്‌ വ്യാഴാഴ്‌ച രാവിലെ 10.45 ന്‌ പാലാ രൂപത
മെത്രാന്‍ മാര്‍ ജോസഫ്‌ കല്ലറങ്ങാട്ട്‌ കൊടിയേറ്റും. കോട്ടയം അതിരൂപത സഹായമെത്രാന്‍
മാര്‍ ജോസഫ്‌ പണ്ടാരശ്ശേരില്‍ ഇരിങ്ങാലക്കുട രൂപത മുന്‍ മെത്രാന്‍ മാര്‍ ജയിംസ്‌
പഴയാറ്റില്‍, സീറോ മലബാര്‍ സഭയുടെ ശ്രേഷ്‌ഠമെത്രാപ്പൊലീത്ത മോറാന്‍, മോര്‍
ബസേലിയോസ്‌ ക്ലീമിസ്‌ കത്തോലിക്കാ ബാവ, ഫരീദാബാദ്‌ മെത്രാപ്പൊലീത്ത മാര്‍
കുര്യാക്കോസ്‌ ഭരണികുളങ്ങര, കൊച്ചി രൂപത മെത്രാന്‍ റൈറ്റ്‌ റവ. ഡോ. ജോസഫ്‌
കരിയില്‍, സാഗര്‍ രൂപതയുടെ മുന്‍ മെത്രാന്‍ മാര്‍ ജോസഫ്‌ പാസ്റ്റര്‍ നീലങ്കാവില്‍,
കാഞ്ഞിരപ്പിള്ളി രൂപത മെത്രാന്‍ മാര്‍ മാത്യു അറയ്‌ക്കല്‍, ബല്‍ത്തങ്ങാടി രൂപത
മെത്രാന്‍ മാര്‍ ലോറന്‍സ്‌ മുക്കുഴി, പാലക്കാട്‌ രൂപത മെത്രാന്‍ മാര്‍ ജേക്കബ്‌
മനത്തോടത്ത്‌, പാല രൂപത മുന്‍ മെത്രാന്‍ മാര്‍ ജോസഫ്‌ പള്ളിക്കാപറമ്പില്‍ എന്നിവര്‍
തിരുനാള്‍ ദിവസങ്ങളില്‍ കുര്‍ബാനയര്‍പ്പിക്കും. തിരുനാള്‍ ദിവസങ്ങളില്‍ സമര്‍പ്പണം,
കുമ്പസാരം, വിളക്കു നേര്‍ച്ച, തൊട്ടില്‍ നേര്‍ച്ച എന്നിവയ്‌ക്കു വിപുലമായ
സൗകര്യങ്ങള്‍ ഒരുക്കിയിട്ടുണ്ട്‌. തിരുനാളിന്റെ സമാപന ദിവസമായ 28 ന്‌ ശനിയാഴ്‌ച
തുടര്‍ച്ചയായ കുര്‍ബാനയും നേര്‍ച്ചയപ്പ വിതരണവും നടത്തുമെന്ന്‌ വിശുദ്ധ അല്‍ഫോന്‍സാ
തീര്‍ത്ഥാടന കേന്ദ്രം റെക്‌ടര്‍ റവ. ഡോ. ജോസഫ്‌ തടത്തില്‍ പറഞ്ഞു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ