കാറും ബസും കൂട്ടിയിടിച്ച്‌ ഒരാള്‍ മരിച്ചു; ബസിന്റെ ടയര്‍ കാലപ്പഴക്കം ചെന്നത്‌

തൊടുപുഴ: കാറും സ്വകാര്യ ബസും കൂട്ടിയിടിച്ച്‌ കൂട്ടിയിടിച്ച്‌ ഡ്രൈവര്‍ മരിച്ചു. ഇന്നലെ വൈകിട്ട്‌ നാല്‌ മണിക്ക്‌ കദളിക്കാട്‌ തെക്കുംമല കവലയിലാണ്‌ അപകടം. സാന്‍ട്രോ കാര്‍ ഓടിച്ചിരുന്ന ആലപ്പുഴ അഴിക്കപ്പറമ്പില്‍ സജിയാണ്‌ മരിച്ചത്‌. സജിയുടെ ഭാര്യാ പിതാവ്‌ ആലപ്പുഴ കപ്പമൂട്ടില്‍ സാബു, ഭാര്യ നസീമ, മക്കളായ സെവിത, മുനീര്‍ എന്നിവര്‍ക്കും ഗുരുതരമായി പരിക്കേറ്റു. പരിക്കേറ്റവരെ മുതലക്കോടത്തെ സ്വകാര്യ ആശുപത്രിയില്‍ പ്രവേശിപ്പിച്ചു. മുവാറ്റുപുഴയ്‌ക്ക്‌ പോവുകയായിരുന്ന ബസ്‌ മറ്റൊരു വാഹനത്തെ മറികടക്കാന്‍ ശ്രമിച്ചപ്പോഴാണ്‌ അപകടം സംഭവിച്ചതെന്ന്‌ ദൃക്‌സാക്ഷികള്‍ പറഞ്ഞു. ഇതിനിടെ സ്വകാര്യബസിന്റെ മുന്‍വശത്തെ ടയറുകള്‍ കട്ടതീര്‍ന്ന്‌ അപകടകരമായ നിലയിലായിരുന്നു. ഇതേ തുടര്‍ന്ന്‌ ക്ഷുഭിതരായ നാട്ടുകാര്‍ ബസിന്റെ ചില്ലുകള്‍ തകര്‍ത്തു. ടയറില്‍ കട്ടയില്ലാതെ നൂല്‌ എഴുന്ന്‌ നില്‍ക്കുന്ന നിലയിലായിരുന്നു.