തൊടുപുഴ : വിദ്യാഭ്യാസ വായ്‌പ ചോദിച്ച്‌ യൂണിയന്‍ ബാങ്കിലെത്തുന്ന വിദ്യാര്‍ത്ഥിനികളോട്‌ അപമര്യാദയായി പെരുമാറിയ മാനേജരെ നിയമപരമായി ശിക്ഷിക്കണമെന്നാവശ്യപ്പെട്ട്‌ യൂത്ത്‌ കോണ്‍ഗ്രസ്‌ മാര്‍ച്ച്‌ നടത്തി. യൂണിയന്‍ ബാങ്ക്‌ മാനേജരെ സര്‍വ്വീസില്‍ നിന്നും പിരിച്ച്‌ വിടണമെന്നും നിയമപരമായി പരമാവധി ശിക്ഷ ഉറപ്പ്‌ വരുത്തണമെന്നും മാര്‍ച്ചിന്‌ നേതൃത്വം നല്‍കിയ യൂത്ത്‌ കോണ്‍ഗ്രസ്‌ പാര്‍ലമെന്റ്‌ പ്രസിഡന്റ്‌ ഡീന്‍ കുര്യാക്കോസ്‌ ആവശ്യപ്പെട്ടു. പ്രകടനവുമായി യൂണിയന്‍ ബാങ്ക്‌ ബ്രാഞ്ചിന്‌ മുന്നിലെത്തിയ യൂത്ത്‌ കോണ്‍ഗ്രസ്‌ പ്രവര്‍ത്തകരെ പോലീസ്‌ തടഞ്ഞു. പോലീസുമായി നേരിയ തോതില്‍ സംഘര്‍ഷം ഉണ്ടായപ്പോള്‍ നേതാക്കളുടെ ഇടപെടലിനെ തുടര്‍ന്ന്‌ സ്ഥിതി ശാന്തമായി. തുടര്‍ന്ന്‌ പോലീസ്‌ സ്റ്റേഷനിലേക്ക്‌ പ്രകടനമായി യൂത്ത്‌ കോണ്‍ഗ്രസ്‌ പ്രവര്‍ത്തകര്‍ നീങ്ങി. അകാരണമായി ലോണ്‍ നിഷേധിക്കുന്ന മാനേജര്‍ പീഢനശ്രമം നടത്തിയിരിക്കുന്നതിനാല്‍ ജാമ്യമില്ലാ വകുപ്പ്‌ ചുമത്തി കോടതിയില്‍ ഹാജരാക്കണമെന്ന്‌ എ.എസ്‌.പി. നിഷാന്തിനിയുമായി നടത്തിയ ചര്‍ച്ചയില്‍ നേതാക്കള്‍ ആവശ്യപ്പെട്ടു. യൂത്ത്‌ കോണ്‍ഗ്രസ്‌ നേതാക്കളായ ഡീന്‍ കുര്യാക്കോസ്‌, മുഹമ്മദ്‌ അന്‍ഷാദ്‌, ജിയോ മാത്യു, വി.ഇ. താജുദ്ദീന്‍, സി.എസ്‌. മഹേഷ്‌, പ്രമോദ്‌ പുളിങ്കുഴ, രാജേഷ്‌ ബാബു, നിയാസ്‌ കൂരാപ്പിള്ളി, ടി.എന്‍ അക്‌ബര്‍, ജെബിന്‍ ജോസ്‌, എന്‍.കെ ബിനുമോന്‍, എം.എച്ച്‌ സജീബ്‌, കെ.എച്ച്‌ ഷാജി, സി.ആര്‍ പ്രശാന്ത്‌, ടി. എച്ച്‌. ഹാരീസ്‌ എന്നിവര്‍ പ്രകടനത്തിന്‌ നേതൃത്വം നല്‍കി.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ